OTHER ARGUMENTS 3: PROPER METHODOLOGY IN NATURAL PHILOSOPHY

- 3. ratio probans dari Eccentricos et Epicyclos. -

Postremo ita licebit propositum concludere. Sicut in philosophia naturali per effectus devenimus in cognitionem causarum, ita etiam in Astronomia, quae de corporibus caelestibus a nobis remotissimus agit, necesse est, ut in cognitionem ipsorum, coordinationem, constitutionemque perveniamus ex effectibus, hoc est, ex motibus stellarum per sensus nostros perceptis. Quemadmodum enim ex generatione, et corruptione mutua rerum naturalium philosophi naturales cum Aristotele Materiam primam cum aliis duobus principiis transmutationis naturalis, et multa alia collegerunt: sic etiam Astronomi per motus caelorum in genere varios ab ortu in occasum, et ab occasu in ortum investigarunt certum numerum sphaerarum caelestium; alii quidem octo, quod octo tantum diversos motus in genere cognoverint, alii autem decem ex decem motibus diversis in genere notatis: Item eadem ratione per alia phainomena<gr> ordinem inter caelestes sphaeras constituerunt, ut cap. 1. copiose a nobis est expositum. Quamobrem conveniens est, et rationi maxime consentaneum, ut ex motibus planetarum particularibus, et variis apparentiis Astronomi inquirant numerum partialium orbium, qui planetas tam variis motibus circumducunt, eorumque constitutionem, ac figuram: ea tamen lege, ac conditione, ut omnium motuum, apparentiarumque causae possint commode assignari, nullumque inde absurdum, quod philosophiae naturali repugnet, inferri possit; Quocirca cum Eccentrici orbes, et Epicycli sint eiusmodi, ut per illos Astronomi nullo labore omnia phainomena tueantur, ut partim ex dictis liquet, partim ex Theoricis planius intelligetur, nullumque ex ipsis absurdum, aut incommodum sequatur in naturali philosophia, ut mox ex solutione argumentorum, quae contra huiusmodi orbes ab adversariis afferri solent, constabit: merito decreverunt Astronomi, planetas in orbibus eccentricis, atque Epicyclis vehi, non autem in concentricis, cum per hos tueri non possimus tam multiplicem varietatem in motibus planetarum.

RESPONSE OF THE ADVERSARIES

Back to list of sections